2025-yil yanvar oyida Oʻzbekistonning tashqi savdo aylanmasi $4,5 milliardni tashkil etdi, deb xabar berdi Statistika agentligi. Bu koʻrsatkich 2024-yilning mos davriga nisbatan 7,1 foizga oshgan.
Ta’kidlanishicha, eksport 14,1 foizga oshib, $1,3 milliardni tashkil etgan. Mamlakat, asosan, chet elga xizmatlar, sanoat mollari va oziq-ovqat mahsulotlari yetkazib bergan.
Oʻzbekiston yonilgʻi-moylash materiallari (+72,4 foiz), ichimliklar va tamaki (+84 foiz), shuningdek, chorva va oʻsimlik yogʻlarini (3,5 barobar) yetkazib berishni sezilarli darajada oshirdi. Shu bilan birga, mashina va transport uskunalari eksporti hajmi 38 foizga kamaydi. Respublikadan meva-sabzavot mahsulotlarini yetkazib berish 8,6 foizga oshib, $81,7 millionni tashkil etdi.
Import yil davomida 4,4 foizga oshib, $3,2 milliardni tashkil etdi. Import tarkibida mashina va transport uskunalari, sanoat tovarlari va kimyoviy moddalar eng katta ulushni egalladi.
Xitoy Oʻzbekistonning eng yirik tashqi savdo sherigi boʻlib qolmoqda. Yanvar oyida ikki davlat oʻrtasidagi tovar ayirboshlash hajmi $994,7 millionni tashkil etdi. Ikkinchi oʻrinni $799,1 mln bilan Rossiya egalladi, uchinchi oʻrinda $313,5 mln bilan Qozogʻiston joylashdi.
Shuningdek, Oʻzbekistonning Germaniya, Afgʻoniston, Hindiston, Turkmaniston, BAA va Finlyandiya bilan tovar ayirboshlash hajmi sezilarli darajada oshdi. Xitoy, Janubiy Koreya, Yaponiya va Italiya bilan pasaygan.
Avvalroq «Kursiv» Oʻzbekistondan eksport yuk tashishlarga talab 48 foizga oʻsgani haqida xabar bergan edi.
