Oq uy Rossiyaga qarshi sanksiyalarni yumshatish rejasini ishlab chiqmoqda
AQSh prezidenti Donald Tramp Moskva bilan diplomatik aloqalarni yaxshilash va Ukrainadagi urushni to‘xtatish maqsadida Rossiyaga nisbatan sanksiyalarni yumshatish bo‘yicha reja ishlab chiqishni boshladi. Reuters agentligi xabariga ko‘ra, Oq uy Davlat departamenti va G‘aznachilik departamentiga ushbu masalada takliflar tayyorlash bo‘yicha topshiriq bergan.
Sanksiyalarning yumshatilishi Rossiya bilan iqtisodiy va diplomatik munosabatlarni yaxshilash doirasida muhokama qilinmoqda. AQSh rasmiylari Moskva bilan bo‘lib o‘tadigan uchrashuvlarda qaysi sanksiyalarni qayta ko‘rib chiqish mumkinligini aniqlash ustida ishlamoqda.
Rossiya bilan iqtisodiy kelishuv ehtimoli
Rossiya dunyoning yirik neft va gaz ishlab chiqaruvchilaridan biri hisoblanadi. AQSh Tramp ma’muriyati Erondan neft eksportini cheklashni rejalashtirar ekan, Rossiyaga nisbatan energetika sohasidagi sanksiyalarni yumshatish yoqilg‘i narxining oshib ketishini oldini olishga yordam berishi mumkin.
Biroq Vashington buning evaziga Rossiyadan qanday yon berishlarini kutayotgani hali noma’lum.
Trampning pozitsiyasi va Kremlning javobi
Yanvar oyida Tramp Moskva urushni tugatish bo‘yicha muzokaralarga tayyor bo‘lmasa, sanksiyalarni kuchaytirishi mumkinligini bildirgan edi. Biroq fevral oyida ma’muriyat rasmiylari sanksiyalarni yumshatish ehtimolini ochiq muhokama qilishni boshladi.
Kreml Rossiyaning nodir metall konlari AQSh bilan iqtisodiy hamkorlik uchun ochiqligini ma’lum qildi. Agar Vashington bilan kelishuvga erishilsa, Rossiya iqtisodiy jihatdan yengillik olish umidida.
Shuningdek, Tramp Ukrainadagi litiy va noyob yer minerallarini qazib olish bo‘yicha kelishuv tuzmoqchi, ammo so‘nggi uchrashuvlarda bu borada kelishuvga erishilmagan.
Hozircha Oq uy va AQSh rasmiy idoralari bu borada rasmiy bayonot bermagan bo‘lsa-da, sanksiyalar bo‘yicha muzokaralar yaqin kunlarda davom ettirilishi kutilmoqda.
Avvalroq Kursiv Uzbekistan Tramp Zelenskiy bilan keskin bahsdan so‘ng Ukrainaga harbiy yordamni to‘xtatishi haqida xabar bergan edi.
