BMT Xalqaro sudining yangi raisi etib Yudzi Ivasava (Yaponiya) saylandi. Bu haqda sud o‘zining X ijtimoiy tarmog‘idagi sahifasida rasman e’lon qildi.
«2025-yil 14-yanvar kuni Navaf Salom raislik lavozimidan iste’foga chiqqani bois Ivasava Yudzi bugun BMT Xalqaro sudi raisi etib saylandi», – deyiladi xabarda.
BMT Xalqaro sudining avvalgi raisi Navaf Salom Livan bosh vaziri lavozimiga tayinlangani sababli iste’foga chiqqan. Aslida, uning sud raisi sifatidagi vakolati 2027-yil 5-fevralgacha davom etishi kerak edi.
Ivasava 2018-yil 22-iyundan beri BMT Xalqaro sudining a’zosi hisoblanib, bugungi kunga qadar u Tokio universitetida xalqaro huquq professori hamda BMT Inson huquqlari bo‘yicha qo‘mitasi raisi lavozimlarida faoliyat yuritgan.
Avvalroq Kursiv Uzbekistan Aziz Toshpo‘latov O‘zbekiston Respublikasi ichki ishlar vaziri lavozimiga tayinlangani haqida yozgandi.
