7-martdan Toshkentda yo‘llarni ta’mirlash mavsumi boshlandi

7-martdan Toshkent shahrida ko‘cha-yo‘l tarmog‘ini ta’mirlash va rekonstruksiya qilish bo‘yicha ishlar boshlandi. Bu haqda Toshkent shahar hokimligi xabar berdi.

Ushbu ishlarni amalga oshirish yo‘l harakati xavfsizligini ta’minlash hamda shahar aholisi va jamoat transporti harakatlanishini yanada qulaylashtirish maqsadida olib borilmoqda.

Tahlillar natijasiga ko‘ra, 2025-yilda joriy va kapital ta’mirlash talab qilinadigan ko‘chalar ro‘yxati tuzilib, manzilli ta’mirlash dasturi ishlab chiqildi. Dastur doirasida jami 65 ming kvadrat metr dan ortiq yo‘llarni ta’mirlash rejalashtirilgan.

Tirbandliklarning oldini olish va haydovchilarga noqulaylik tug‘dirmaslik uchun ta’mirlash ishlari asosan transport harakati kam bo‘lgan soatlarda tashkil etiladi.

Avvalroq Kursiv Uzbekistan Toshkent – Andijon va Toshkent – Samarqand pullik yo‘llarini qurish 2025-yilda boshlanishi haqida yozgandi.