Tesla aksiyalari pasayishda davom etmoqda

Amerikalik tadbirkor Ilon Maskga tegishli Tesla kompaniyasi aksiyalari shu haftaning dushanba kuni 15 foizdan ortiqqa pastladi. Bu haqda Yahoo Finance portali xabar berdi.

Kompaniya aksiyalarining qiymati 2024-yil noyabr oyidagi darajaga qaytdi. O‘sha paytda AQShda prezidentlik saylovlari bo‘lib o‘tgan va ularning natijasida Donald Tramp hokimiyatga kelgandi. Ilon Mask Trampning siyosiy ambitsiyalarini ochiq qo‘llab-quvvatlagan.

Tramp g‘alabasidan so‘ng Tesla aksiyalari o‘sishni boshlagan, natijada 2024-yil dekabr oyida ular 50 foiz qimmatroq bo‘lgan ($479 ga yetgan). Hozir esa aksiyalar bor-yo‘g‘i $222 atrofida baholanmoqda.

Tahlilchilarning fikriga ko‘ra, Tesla aksiyalarining arzonlashishiga bir necha omillar ta’sir qilgan. Birinchidan, Model 3 va Model Y avtomobillariga talab pasayishi tufayli kompaniyaning yetkazib berish bo‘yicha prognozlari sustlashgan. Ikkinchidan, Maskning so‘nggi chiqishlari va harakatlari jamoatchilik tomonidan bahs-munozaralarga sabab bo‘lmoqda. U Tramp g‘alabasidan so‘ng siyosiy ta’sir doirasini kengaytirgan.

Avvalroq Kursiv Uzbekistan Mask Trampning harakatlari tufayli bir kunda 114 trln so‘m yo‘qotgani haqida yozgandi.