13-mart kuni Armaniston va Ozarbayjon vakillari muzokaralarni yakunlab, tinchlik kelishuvi matnini kelishib oldi. Bu haqda ikki davlat tashqi ishlar vazirliklari rasman ma’lum qildi.
Ozarbayjon tashqi ishlar vaziri Jayhun Bayramovning so‘zlariga ko‘ra, Armaniston tinchlik bitimi loyihasidagi oxirgi ikkita bahsli bandni qabul qilgan.
«Keyingi bosqichda Boku Armaniston konstitutsiyasiga o‘zgartirish kiritilishini kutmoqda, chunki unda hali ham Ozarbayjonga nisbatan hududiy da’volar mavjud», – dedi Bayramov.
Armaniston hukumati esa hujjatni imzolash muddati va joyi bo‘yicha Ozarbayjon bilan maslahatlashishga tayyor ekanligini bildirdi. 2023-yildan beri ikkala davlat tinchlik bitimi ustida muzokaralar olib bormoqda. O‘sha yili Boku harbiy operatsiya o‘tkazib, Tog‘li Qorabog‘ ustidan nazoratni qo‘lga kiritgandi.
2025-yil fevral oyida Armaniston bosh vaziri Nikol Pashinyan tomonlar tinchlik bitimining 17 bandidan 15 tasi bo‘yicha kelishib olganini ma’lum qilgandi. Biroq xalqaro sudlarda o‘zaro da’volardan voz kechish va chegarada uchinchi kuchlarni joylashtirmaslik masalalari hali ham ochiq qolayotgani ta’kidlangan.
Hozircha tinchlik bitimi qachon imzolanishi haqida aniq ma’lumot berilmagan.
Avvalroq «Kursiv» O‘zbekiston, Ozarbayjon va Qozog‘iston «yashil» energiya bo‘yicha hamkorlik qilishi haqida yozgandi.
