Shavkat Mirziyoyev shoir va tadbirkorni «Do‘stlik» ordeni bilan mukofotladi

Bugun, 22-mart kuni Shavkat Mirziyoyev shoir, ma’naviyat targ‘ibotchisi Rahimov Xushboq va TSC HK Investment MCHJ ta’sischisi Tian Shuchunni «Do‘stlik» ordeni bilan mukofotlash to‘g‘risida farmon qabul qildi.

«Ko‘p yillik samarali badiiy-ijodiy faoliyati bilan zamonaviy adabiyotimizni vatanparvarlik, fidoyilik, insoniylikni tarannum etuvchi asarlar bilan boyitish, xalqimizning ong-u tafakkuri, ma’naviy salohiyatini yuksaltirish, farzandlarimizni Vatanga muhabbat va sadoqat ruhida tarbiyalashga qo‘shgan munosib hissasi, yurtimizdagi tub islohotlar mohiyatini jamoatchilikka yetkazish, jamiyatda millatlararo do‘stlik va totuvlikni, turli millat va elat vakillari o‘rtasida o‘zaro hamjihatlik, mehr-oqibat muhitini mustahkamlash, milliy madaniyatlar va an’analarni rivojlantirish borasidagi katta xizmatlari hamda ijtimoiy hayotdagi faol ishtiroki uchun shoir, ma’naviyat targ‘ibotchisi Rahimov Xushboq «Do‘stlik» ordeni bilan mukofotlansin», – deyiladi farmonda.

Shuningdek, Xitoy va O‘zbekiston o‘rtasidagi savdo-iqtisodiy aloqalarni mustahkamlash, ikki tomonlama manfaatli sheriklikni rivojlantirishda hissasini qo‘shayotgan TSC HK Investment MCHJ ta’sischisi Tian Shuchun ham mukofotlandi.

Avvalroq Kursiv Uzbekistan Shavkat Mirziyoyev ikki nafar qishloq xoʻjaligi faolini «Doʻstlik» ordeni bilan mukofotlagani haqida yozgandi.