Asman Airlines O‘zbekistonga parvozlarni yo‘lga qo‘yishni rejalashtirmoqda

Qirg‘izistonning Asman Airlines aviakompaniyasi bu yildan boshlab Qozog‘iston va O‘zbekistonga muntazam parvozlarni amalga oshirishni rejalashtirmoqda. Bu haqda TASS agentligi «Qirg‘iziston aeroportlari» OAJ boshqaruv raisi Manasbek Samidinov xabariga tayanib ma’lum qildi.

Samidinovning so‘zlariga ko‘ra, kompaniya 2026 – 2027-yillarda xalqaro yo‘nalishlarni kengaytirish niyatida. Bu maqsadda Airbus A320 va A321 samolyotlarini sotib olishni rejalashtirilgan. Bundan tashqari, Yaqin Sharq va Yevropa davlatlariga ham reyslar yo‘lga qo‘yilishi mumkin.

Ma’lumot uchun, 2024-yilda aviakompaniya o‘z parkini uchta Dash 8-400 samolyoti bilan to‘ldirib, mahalliy yo‘nalishlarda parvozlarni boshlagandi. Jumladan, O‘sh, Qorako‘l, Talas va Jalolobod shaharlari bilan havo aloqasi yo‘lga qo‘yildi.

Avvalroq Kursiv Uzbekistan AZAL Boku – Samarqand yo‘nalishida parvozlarni qayta tiklagani haqida yozgandi.