«112» yagona dispetcherlik xizmati toʻliq ishga tushdi – Raqamli texnologiyalar vazirligi
Oʻzbekistonda aholiga shoshilinch yordam koʻrsatishni yanada samarali tashkil etish maqsadida yagona «112» dispetcherlik xizmati joriy etildi. Bu haqda Raqamli texnologiyalar vazirligi ma’lum qildi.
2023-yil iyul oyida Fargʻona shahrida oʻtkazilgan yigʻilishda prezident Shavkat Mirziyoyev Ichki ishlar va Raqamli texnologiyalar vazirliklari oldiga yagona «112» raqami va dispetcherlik tizimini ishga tushirish vazifasini qoʻygan edi. Shu asosda Vazirlar Mahkamasining qarori bilan mazkur xizmat bosqichma-bosqich joriy etildi.
Hukumat qaroriga muvofiq, «112» yagona dispetcherlik xizmati quyidagi muddatlarda faoliyat boshlashi rejalashtirilgan:
- 2024-yil 1-iyundan – Toshkent shahri va Toshkent viloyatida;
- 2024-yil birinchi yarim yilligida – Andijon, Namangan va Fargʻona viloyatlarida;
- 2024-yil yakuniga qadar – Qoraqalpogʻiston Respublikasi va qolgan viloyatlarda.
Ma’lum qilinishicha, hozirgi vaqtda «112» tizimi respublikaning barcha hududida toʻliq ishga tushgan va faoliyat yuritmoqda.
Ma’lumot uchun, «112» yagona dispetcherlik xizmati ichki ishlar, favqulodda vaziyatlar, tez tibbiy yordam, ijtimoiy himoya va «Hududgazta’minot» kabi xizmatlarni birlashtirib, aholi murojaatlarini qabul qilish va qayta ishlashda yagona platforma vazifasini bajaradi.
Avvalroq Kursiv Uzbekistan 2024-yilda «103» xizmatiga 2,7 mingdan ortiq yolg‘on chaqiriqlar tushgani haqida xabar bergan edi.
