Xitoy O‘zbekistonni eng yaxshi madaniy dam olish yo‘nalishi deb e’tirof etdi

Pekinda bo‘lib o‘tgan «World Leisure Awards – 2024» mukofotlarini topshirish marosimida O‘zbekiston madaniy hordiq chiqarish uchun eng yaxshi yo‘nalish, deb topildi. Bu haqda «Dunyo» axborot agentligi xabar berdi.

Tadbirni «Travel&Leisure» nashri tashkil etgan bo‘lib, unda xorijiy diplomatik korpus vakillari, turizm sohasi mutaxassislari va Xitoy OAV ishtirok etdi. Nashr bosh muharriri Syao Yan O‘zbekistonning turizm sohasidagi ulkan salohiyatini ta’kidlab, mamlakat noyob arxitekturasi va tarixiy obidalari bilan sayyohlar uchun eng jozibali yo‘nalishlardan biriga aylanganini qayd etdi.

Shuningdek, bu yil Xitoyda «O‘zbekiston Turizm yili» deb e’lon qilingani eslatib o‘tildi. Ushbu yil doirasida turli madaniy tadbirlar o‘tkazilib, ikki davlat o‘rtasidagi havo qatnovlari soni ikki baravarga oshirilgan.

Bundan tashqari, 2025-yilda YUNESKO Bosh konferensiyasining 43-sessiyasi ilk bor Parijdan tashqarida – Samarqand shahrida o‘tkazilishi alohida ta’kidlandi.

Avvalroq Kursiv Uzbekistan prezident Fransiyaning Faxriy legion ordeni bilan taqdirlangani haqida yozgandi.