O‘zbekistonlik hamshiralar Qatarga ishga taklif qilinmoqda – oylik $2750

Qatarning Hamad tibbiyot korporatsiyasi va Migratsiya agentligi o‘zbekistonlik hamshiralarga ish o‘rinlarini taklif etmoqda. Bu haqda agentlik rasmiy sahifasida ma’lum qilindi.

Unga ko‘ra, boshlanishiga 10 ta bo‘sh ish o‘rni mavjud bo‘lib, ish haqi $2000 – $2750 ni tashkil etadi. Qatarga borish xarajatlari va aviabilet, ishchi viza, tibbiy sug‘urta hamda uy-joy, mahalliy transport to‘lovlari ish beruvchi hisobidan qoplanadi.

Ishga qabul qilinadigan nomzodlar 18-yoshdan 50-yoshgacha bo‘lishi, ingliz tilini kamida «B1» darajada bilishi lozim. Rus va arab tillarini bilish ustunlik beradi. Shuningdek, hamshiralik sohasida kamida ikki yillik tajriba talab qilinadi.

Ish vaqti haftasiga 48 soatni tashkil qilib, 3 smenada olib boriladi.

Ro‘yxatdan o‘tish uchun xorijdaish.uz sahifasiga, qo‘shimcha ma’lumot uchun esa +998 71-202-33-55 (ichki raqam 30) telefon raqamiga murojaat qilish mumkin.

Avvalroq «Kursiv» o‘zbekistonliklar Qatardagi Duty-Free savdo tarmoqlariga ishga taklif qilinayotgani haqida yozgandi.