Qanday hollarda pul oʻtkazmalari uchun soliq toʻlanadi

Soliq qoʻmitasi qaysi hollarda pul oʻtkazmasi soliqqa tortilishi mumkinligi boʻyicha tushuntirish berdi.

Qoʻmitaning ta’kidlashicha, agar jismoniy shaxs boshqa shaxsdan pul oʻtkazmasini olgan boʻlsa, unda hech qanday toʻlov olinmaydi. Agar pul chet el kompaniyasidan kelib tushsa, u soliqqa tortiladi. Bunday holda 1-aprelgacha deklaratsiya topshirish kerak.

Banklar soliq organlariga yuridik shaxslardan tushumlar boʻyicha umumlashtirilgan ma’lumotlarni taqdim etadi. Agar deklaratsiya taqdim etilmasa, tartibga soluvchi ushbu ma’lumotlar asosida soliqni hisoblab chiqadi va bu haqda xabardor qiladi.

Bunday holda soliq 2025-yil 2-iyungacha toʻlanishi shart. Ammo agar chet el kompaniyasidan oʻtkazmalar oʻz-oʻzini ish bilan ta’minlash litsenziyasiga ega boʻlgan jismoniy shaxsga tushsa va uning yil davomidagi jami daromadi 100 mln soʻmdan oshmasa, ushbu daromaddan soliqqa tortilmaydi.

Agar toʻlov notoʻgʻri hisoblangan boʻlsa yoki summa juda katta boʻlsa, my3.soliq.uz sayti orqali qayta hisob-kitob qilish uchun murojaat qilishi ma’lum qilingan.

Avvalroq «Kursiv» Oʻzbekistonga 2024-yilda kelib tushgan pul oʻtkazmalari 30 foizga oshgani haqida yozgan edi.