Uch nafar o‘zbekistonlikka o‘lim jazosi tayinlandi
Abu-Dabi federal apellyatsiya sudi Davlat xavfsizlik palatasi Moldova – Isroil fuqarosi Zvi Koganni o‘g‘irlash va o‘ldirishda ayblangan shaxslarni aybdor deb topdi. Uch nafar ayblanuvchi o‘lim jazosiga hukm qilindi, yana bir shaxs esa terrorchilik niyatida qasddan odam o‘ldirishda ayblanib, umrbod qamoq jazosini oldi.
Davlat xavfsizlik prokuraturasi olib borgan tergov natijalariga ko‘ra, sudlanuvchilar jabrlanuvchini kuzatib, keyin esa o‘ldirishgan. Sud jarayonida jinoyatning batafsil tafsilotlari, jumladan, sud-tibbiy ekspertiza xulosalari, guvohlarning ko‘rsatmalari va jinoyatda ishlatilgan asboblar taqdim etildi.
Sudning qaroriga ko‘ra, qotillik va odam o‘g‘irlashni amalga oshirgan uch nafar shaxsga o‘lim jazosi tayinlandi, ularga yordam bergan sherigi esa umrbod qamoq jazosiga mahkum etildi va jazo muddati tugagach mamlakatdan chiqarib yuboriladi.
BAA qonunchiligiga muvofiq, o‘lim jazosi bo‘yicha hukm avtomatik ravishda apellyatsiya qilinadi va Federal Oliy sudning Jinoyat ishlari bo‘limi tomonidan qayta ko‘rib chiqiladi.
Bosh prokuror Hamad Saif Al Shamsining ta’kidlashicha, ushbu hukm BAAning terrorizm va jinoyatchilikka qarshi kurash borasidagi qat’iy pozitsiyasini aks ettiradi. U, shuningdek, mamlakat qonunlari barcha aholini millati va diniy mansubligidan qat’i nazar, himoya qilishini hamda xavfsizlik va barqarorlikni ta’minlashga qaratilganini ta’kidlab o‘tdi.
Avvalroq Kursiv Uzbekistan Svi Kogan ishi bo‘yicha o‘zbekistonliklarga o‘lim jazosi tayinlangani haqidagi ma’lumot aniqlashtirilayotgani haqida xabar bergan edi.
