«Akademik harakatchanlik» dasturiga qabul boshlandi: barcha xarajatlar davlat tomonidan qoplanadi

2025-yil 1-apreldan boshlab «Akademik harakatchanlik» dasturi tanlovida ishtirok etish uchun hujjatlar qabul qilinmoqda. Bu haqda Ilmiy-texnik axborot markazi ma’lum qildi.

Unga ko‘ra, ushbu dastur yosh olimlarga ilmiy tashkilotlar va oliy ta’lim muassasalarining noyob ilmiy obyektlari, zamonaviy laboratoriyalar va tajriba-konstruktorlik byurolaridan bepul foydalanish imkonini beradi. Arizalar 30-aprelga qadar onlayn tarzda akadem.ilmiy.uz platformasida qabul qilinadi.

Dasturda ishtirok etish uchun loyiha ijrochisi 40 yoshdan oshmasligi kerak. Bitta ishtirokchi faqat bitta ilmiy loyiha bilan ishtirok etadi. Ilmiy loyiha summasi bazaviy hisoblash miqdorining 200 baravaridan oshmasligi kerak. Dastur muddati 1 oydan 6 oygacha bo‘lishi mumkin. Loyihalarni amalga oshirish bilan bog‘liq barcha xarajatlar davlat tomonidan to‘liq qoplab beriladi.

Dastur haqida batafsil ma’lumotlarni ushbu havolada. Ariza topshirish va boshqa savollar bo‘yicha (71) 203-32-23 (246) raqamiga murojaat qilishingiz mumkin.

Eslatib o‘tamiz, avvalroq maktab bitiruvchilari uchun fan olimpiadasi e’lon qilingan edi.