Galaxy Tab S9 Ultra aslida kimlar uchun mo‘ljallangan
Galaxy Tab S9 Ultra plansheti Samsung kompaniyasi tomonidan taqdim etilgan edi. Kursiv Uzbekistan nashri ushbu planshet haqidagi ma’lumotlarni Sammobile nashriga tayanib tayyorladi.
Keng ekran
Galaxy Tab S9 Ultra plansheti 14,6 dyuymli Dynamic AMOLED 2X ekraniga ega. Ekran yorqin tasvirlar va silliq animatsiyalarni taqdim etadi. 120 Hz yangilanish tezligi video va o‘yinlarda qulaylik yaratadi. 5,5 mm qalinlikdagi nafis dizayn va IP68 suvga chidamliligi uni ajratib turadi.
Kuchli ishlash qobiliyati
Snapdragon 8 Gen 2 chipseti bilan ta’minlangan planshet yuqori unumdorlikni ta’minlaydi. 12 GB yoki 16 GB operativ xotira yordamida og’ir ilovalar muammosiz ishlaydi. Samsung One UI interfeysi esa foydalanuvchiga qulaylik yaratadi.
S Pen stilusi
S Pen stilusi yuqori bosim sezgirligi va tezkor javob berish xususiyatlariga ega. Grafik dizayn va yozish uchun juda qulay. Samsung DeX rejimi esa planshetingizni ish jarayonida samarali ishlatishni ta’minlaydi.
Batareya
11,200 mA/soat batareya uzoq davom etadigan ishlashni ta’minlaydi. Video tomosha qilishda bir necha soat davomida quvvatni ushlab turadi. Tez zaryadlash texnologiyasi esa planshetni qisqa vaqt ichida to‘liq zaryadlaydi.
Ushbu planshet premium sinfdagi ilg‘or Android planshetidir. Grafik dizayn, kontent yaratish yoki yuqori unumdorlikni talab qiladigan ishlarni bajarayotgan foydalanuvchilar uchun ideal tanlov. Galaxy Tab S8 Ultra ega bo‘lganlar uchun yangilanishning katta farqlari yo‘q.
Kimlar uchun?
- Katta ekranli planshetni afzal ko‘radiganlar
- Grafik dizaynerlar va kontent yaratuvchilar
- Ish va ta’lim uchun yuqori unumdorlikni xohlaydiganlar
Kimlar uchun emas?
- Kichik va yengil planshetni afzal ko‘radiganlar
- Oddiy foydalanish uchun arzonroq variant izlayotganlar
Avvalroq Kursiv Uzbekistan Galaxy Z Flip 6 sotib olishga arziydimi yoki yo‘qligi haqida yozgan edi.
