Goodyear kompaniyasi Trampning yangi bojlaridan foyda koʻradi – Deutsche Bank
Deutsche Bank tahlilchilari shina ishlab chiqaruvchi Goodyear Tire & Rubber Co. kompaniyasi aksiyalari boʻyicha tavsiyalarini «Ushlab turish»dan «Sotib olish»ga oʻzgartirdi. Bank ekspertlari AQShning import avtomobillarga qoʻyayotgan yangi bojlar fonida kompaniya oʻsish imkoniyatiga ega ekanini taʼkidlamoqda.
Tahlilchilarning fikricha, shina ishlab chiqaruvchi bir necha sababga koʻra bozor sharoitidan yutadi:
- Goodyear mahsulotlariga asosiy talab Amerika avtomobil ishlab chiqaruvchilaridan keladi;
- shinalar yangi import tariflariga kirmaydi;
- yangi avtomobillar savdosi kamayishi eski mashinalarga almashtiriladigan shinalarga talabni oshiradi.
Goodyear aksiyalariga boʻlgan qiziqish Argus tahlilchilari tomonidan ham qoʻllab-quvvatlandi. Ularning taʼkidlashicha, 2024-yilning toʻrtinchi choragida kompaniya foydaga qaytgan. $291 millionlik zarardan $76 millionlik sof foydaga erishilgan.
Global miqyosda faoliyat yuritayotganiga qaramay, Goodyear Xitoy ishlab chiqaruvchilari va yangi texnologiyalar sababli kuchli raqobatga duch kelmoqda. Shuning uchun 2023-yilda kompaniya transformatsiya rejasini ishga tushirdi, unga quyidagilar kiradi:
- 2025-yilgacha xarajatlarni $1,5 milliardga qisqartirish;
- virjiniyadagi zavodning bir qismini yopish va xodimlarni qisqartirish;
- yoʻltanlamas shinalar ishlab chiqarish boʻlinmasini sotish.
Deutsche Bank tavsiyasidan soʻng Goodyear aksiyalari 5 foizga oshdi, ammo umuman olganda, transformatsiya jarayoni boshlanganidan beri kompaniya bozor kapitallashuvining 35 foizini yoʻqotgan.
MarketWatch ma’lumotlariga koʻra, 10 ta tahlilchidan 5 nafari aksiyalarni sotib olishni, 5 nafari esa ushlab turishni maslahat bermoqda. Oʻrtacha maqsadli narx $12,12 boʻlib, bu joriy narxdan 33 foizga yuqori.
Avvalroq Kursiv Uzbekistan Tramp AQShga import qilinadigan avtomobillarga 25 foizlik boj joriy qilgani haqida yozgan edi.
