Taniqli futbol skauti Jank Chetin Manchester Evening News nashriga bergan intervyusida Oʻzbekiston terma jamoasi va «Manchester Siti» klubi himoyachisi Abduqodir Husanov haqida ijobiy fikr bildirdi.
U yosh futbolchining mahoratini yuqori baholab, uning muvaffaqiyatlari Markaziy Osiyo futbolchilariga boʻlgan qiziqishni oshirayotganini ta’kidladi.
Chetinning fikricha, Husanov 2023-yilda Argentinada oʻtgan U-20 Jahon chempionatida yuqori darajada oʻynagan. U turnir davomida havodagi kurashlarda raqiblariga imkoniyat qoldirmagan va jismoniy kuchi bilan ajralib turgan. Shuningdek, tezkor va harakatchanligi bilan e’tiborni tortgan.
Skaut futbolchining, ayniqsa, Isroilga qarshi 1/8 final uchrashuvidagi harakatlarini alohida ta’kidladi.
«Husanov oʻyinni oʻqish, toʻgʻri joylashish, toʻpni olib qoʻyish va yakka kurashlarda himoyalanish borasida yuqori darajani koʻrsatdi. U kuchli hujumchilar bilan muvaffaqiyatli kurashdi», – dedi u.
Shuningdek, Jank Chetin Husanovning rivojlanish salohiyatiga ishonch bildirar ekan, uning Pep Gvardiola qoʻl ostida yanada yuqori saviyali futbolchiga aylanishi mumkinligini aytdi.
«U vaqt oʻtishi bilan til bilan bogʻliq muammoni yengib oʻtadi va ʼManchester Sitiʼ tarkibida asosiy futbolchilardan biriga aylanadi», – deydi Chetin.
Skautning fikricha, Markaziy Osiyo futboli tez rivojlanmoqda va Husanov kabi iqtidorli futbolchilar ushbu mintaqaning jahon futbol bozoridagi mavqeyini kuchaytirib bormoqda.
Avvalroq Kursiv Uzbekistan Husanov «Bornmut» bilan oʻyinda sariq kartochka olgani haqida xabar bergan edi.
