«SSKA» yarim himoyachisi Abbosbek Fayzullayevning Portugaliyaga ko‘chib o‘tish imkoniyati mavjud edi, ammo transfer oxirgi pallada amalga oshmadi. Uning agenti German Tkachenko sport24.ru nashriga bergan intervyusida ushbu jarayon tafsilotlarini ma’lum qildi.
Manbaga ko‘ra, Fayzullayevning «Benfika»ga o‘tishi bo‘yicha dastlab muzokaralar olib borilgan, biroq klub rahbariyati transferdan voz kechgan. Bunga asosiy sabab sifatida siyosiy omillar ko‘rsatilmoqda.
«Biz Abbosbekni «Benfika»ga o‘tkazish borasida muzokara olib bordik. Biroq klub Rossiya yoki Rossiya chempionatida o‘ynayotgan futbolchilar bilan ishlashni istamasligini bildirdi. Ular bizga: «Rossiya bilan hech qanday aloqa o‘rnatmoqchi emasmiz» degan ma’nodagi fikrni yetkazishdi,» — deydi agent.
Shu tariqa o‘zbekistonlik futbolchining Portugaliya klubi safiga qo‘shilish ehtimoli bekor qilindi. Abbosbek Fayzullayev esa hozircha Moskvaning «SSKA» klubida o‘z faoliyatini davom ettirmoqda.
Avvalroq Kursiv Uzbekistan Abbosbek Fayzullayev Turkiyaning grand klubiga oʻtishi mumkinligi haqida xabar bergan edi.
