O‘zbekistonda aviatsiya yoqilg‘isi ishlab chiqarish imkoniyatlari ko‘rib chiqilmoqda

2-aprel kuni Samarqandda Investitsiyalar, sanoat va savdo vaziri Laziz Kudratov «Air Products and Chemicals Inc» bosh ijrochi direktori Eduardo Menezes bilan uchrashdi. Bu haqda vazirlik rasmiy sahifasida ma’lum qilindi.

Unga ko‘ra, tomonlar O‘zbekistonda amalga oshirilayotgan va istiqbolli investitsiya loyihalarini muhokama qildilar. 2019-yildan buyon kompaniya mamlakatimizda $1,15 mlrdlik Farg‘onada vodorod va «Navoiyazot»da karbonat angidrid ishlab chiqarish kabi uchta yirik loyihani amalga oshirdi.

Hozirda Buxoroda $200 mlnlik kislorod va azot ishlab chiqarish loyihasi amalga oshirilmoqda. Shuningdek, uglerodni saqlash, aviatsiya yoqilg‘isi ishlab chiqarish va ko‘mirni gazlashtirish bo‘yicha yangi tashabbuslar ko‘rib chiqilmoqda.

Uchrashuv yakunida tomonlar hamkorlikni chuqurlashtirish va yangi loyihalarni amalga oshirishga tayyor ekanliklarini bildirishdi.

Eslatib o‘tamiz, avvalroq oltita viloyatda qattiq chiqindilarni yoqish orqali elektr ishlab chiqarilishi haqid xabar bergan edik.