O‘zbekistonda Energiya samaradorligi milliy agentligi tashkil etiladi

27-mart kuni imzolangan prezident farmoni bilan Vazirlar Mahkamasi huzurida Energiya samaradorligi milliy agentligi (Agentlik) tashkil etiladi. Bu haqda Adliya vazirligi xabar berdi.

Yangi agentlik energiya samaradorligini oshirish bo‘yicha yagona davlat siyosatini shakllantiradi va amalga oshiradi.

Shuningdek, 1-iyuldan boshlab aholi uy-joylarining energiya auditi bo‘yicha xarajatlari davlat tomonidan qoplanadi. Quyosh panellari va geliokollektorlar narxining 20 foizi, havo, suv va geotermal issiqlik nasoslari narxining 40 foizi davlat tomonidan to‘lab beriladi. Lekin subsidiyalar miqdori BHMning 50 baravaridan oshmagan holda taqdim etiladi.

Shu bilan birga, 1-sentabrgacha Energiya samaradorligini oshirish raqamli platformasi ishga tushiriladi. Ushbu platforma orqali energiya tejovchi texnologiyalarni targ‘ib qilish, monitoring o‘tkazish va subsidiyalarni taqsimlash nazorat qilinadi.

Budjetdan tashqari Energiya samaradorligini rag‘batlantirish va qo‘llab-quvvatlash jamg‘armasi tashkil etiladi. Bu jamg‘arma orqali energiya tejamkor texnologiyalarni joriy etish va innovatsiyalarni qo‘llab-quvvatlash rejalashtirilgan.

Shu yilning 1-oktabriga qadar esa ishlab chiqaruvchilar va import qiluvchilar uchun texnologiyalar energiya samaradorligining yangi «yashil» standartlari joriy etiladi. Ushbu standartlar orqali bozorda faqat ekologik va energiya tejamkor texnologiyalar foydalanishga ruxsat etiladi.

Avvalroq Kursiv Uzbekistan oltita viloyatda qattiq chiqindilarni yoqish orqali elektr ishlab chiqarilishi haqida yozgandi.