Ispaniya kubogi yarimfinal javob bahsida «Real Madrid» o‘z maydonida «Real Sosedad»ni qabul qilib, 115-daqiqada urilgan gol evaziga final yoʻllanmasiga ega chiqdi.
Dastlabki uchrashuvda «Real» 1:0 hisobida gʻalaba qozongan va bu safargi bahsda ham kamida ushbu ustunlikni saqlab qolishi kifoya edi. Uchrashuvda Barrenechea hisobni ochgan boʻlsa, Endrik 30-daqiqada muvozanatni tikladi.
72-daqiqada Alaba xatoga yo‘l qo‘yib, to‘pni o‘z darvozasiga yo‘naltirdi. 80-daqiqada esa Oyarzabal aniq zarba yo‘llab, hisobni yiriklashtirdi – 3:1.
Ammo madridliklar tezda javob qaytardi – avval Bellingem, oradan toʻrt daqiqa oʻtib esa Chuameni gol urib, hisobni 3:3 koʻrinishiga keltirdi.
Bu natija «Real Madrid»ni finalga olib chiqayotgan edi, biroq hakam qoʻshib bergan daqiqalarning uchinchisida Oyarzabal dubl qayd etib, oʻyinni qoʻshimcha boʻlimlarga olib oʻtdi – 3:4 (umumiy 4:4).
Hamma penaltilar seriyasini kutayotgan bir paytda 115-daqiqada Arda Guler jarima maydonchasiga aniq uzatma yoʻlladi, uni Antonio Ryudiger boshi bilan darvozaga yoʻllab, Madrid klubiga gʻalaba taqdim etdi – 4:4 (umumiy 5:4). Shu tariqa «Real Madrid» Ispaniya kubogining ilk finalchisiga aylandi.
Eslatib oʻtamiz, ikkinchi finalchi nomi 3-aprelga oʻtar kechasi «Atletiko» va «Barselona» oʻrtasidagi bahsdan soʻng ma’lum boʻladi.
Avvalroq Kursiv Uzbekistan Chempionlar ligasi doirasida «Real» «Atletiko»ni penaltilar seriyasida magʻlub etgani haqida xabar bergan edi.
