Samsung korporatsiyasi o‘z gadjetlarida qattiq jismli akkumulyatorlardan foydalanishni boshlaydi. Bu haqda Koreyaning Money Today nashri xabar berdi.
2025-yil oxirida chiqarilishi rejalashtirilgan Galaxy Ring 2 aqlli uzuk birinchi marta qattiq holatdagi akkumulyatordan foydalanadi. Xabar qilinishicha, bunday batareya odatdagidan ko‘ra ko‘proq zichlikka ega, shuning uchun aqlli uzukning avtonom ishlash muddati oshishi mumkin.
Hisobotga ko‘ra, «qattiq elektrolitlar» asosidagi yangi akkumulyator oddiy batareyaga qaraganda xavfsizroq bo‘lib, yonish xavfi kamroq. Samsung ushbu texnologiyani Dream Battery («Orzular batareyasi») deb atagan va uni avvalo aqlli uzuk hamda soatlarga joriy etishni rejalashtirmoqda.
Biroq uning asosiy kamchiligi – yuqori narx. Money Today ekspertlari Galaxy Ring’ga bo‘lgan past qiziqish tufayli Samsung bu gadjetlarda qattiq jismli akkumulyatorlardan voz kechishi mumkinligini taxmin qilmoqda. Samsung ushbu texnologiya borasida izoh berishdan bosh tortdi.
Eslatib oʻtamiz, Kursiv Uzbekistan Samsung soxta smartfonlar haqidagi ogohlantirishni e’lon qilgani haqida yozgan edi.
