SF Airlines aviakompaniyasi Toshkentga parvozlarni yo‘lga qo‘ydi

SF Airlines aviakompaniyasi 2-aprelda Lanchjou – Toshkent – Lanchjou yo‘nalishida ilk yuk reysini amalga oshirdi.
Aviakompaniyaning Boeing 757 samolyoti Toshkent xalqaro aeroportiga mahalliy vaqt bilan soat 10:40 da qo‘ndi. An’anaga ko‘ra, samolyot suv arkasi bilan kutib olindi.
Dastlabki bosqichda reyslar haftasiga ikki marta amalga oshirilishi rejalashtirilgan bo‘lib, kelajakda parvozlar soni oshirilishi kutilmoqda. Yuk tashish jarayoni Boeing 757 samolyotlari yordamida amalga oshiriladi.
Ma’lumot uchun, SF Airlines Xitoyning yetakchi yuk aviakompaniyalaridan biri bo‘lib, uning shtab-kvartirasi Shenchjenda (Guangdong, Xitoy) joylashgan. 2005-yilda tashkil etilgan aviakompaniya Xitoyning eng yirik logistika guruhlaridan biri SF Holding Company Limited tarkibiga kiradi.
Avvalroq Kursiv Uzbekistan China Southern Airlines O‘zbekistonga parvozlar chastotasini oshirishni rejalashtirayotgani haqida xabar bergan edi.