Shavkat Mirziyoyev sammitda qatnashish uchun Samarqandga keldi
Bugun, 2-aprel kuni Shavkat Mirziyoyev «Markaziy Osiyo – Yevropa Ittifoqi» birinchi sammiti tadbirlarida ishtirok etish uchun Samarqandga keldi. Bu haqda prezident matbuot xizmati xabar qildi.
Shuningdek, prezident bugun Yevropa kengashi prezidenti Antoniu Koshta bilan norasmiy uchrashuv olib boradi.
Ertaga, 3-aprel kuni sammitda ishtirok etadigan delegatsiyalar rahbarlari bilan ham qator ikki tomonlama muzokaralar o‘tkazilishi rejalashtirilmoqda. Sammitning ikkinchi kunida Markaziy Osiyo davlatlari va Yevropa Ittifoqining asosiy institutlari rahbarlari ishtirokida ko‘p tomonlama tadbirlar o‘tkaziladi.
Avvalroq Kursiv Uzbekistan Yevropa kengashi prezidenti Samarqandda kelgani haqida yozgandi.
Yevropa kengashi prezidenti Antoniu Koshta Samarqand xalqaro aeroportida O‘zbekiston Respublikasi Bosh vaziri Abdulla Aripov va boshqa rasmiylar tomonidan kutib olindi. Yevropa kengashi prezidenti qisqa suhbatdan so‘ng tashrif dasturiga muvofiq navbatdagi manzilga yo‘l oldi.
Shuningdek, Shavkat Mirziyoyev Euronews telekanaliga bergan intervyusida sammitning Samarqandda o‘tkazilishi ham bejiz emasligini ta’kidladi. Bu qadimiy shahar tarixiy jihatdan savdo, ilm-fan va diplomatiya markazi bo‘lib kelgan. Bugungi kunda ham u xalqaro muloqot va muhim qarorlar qabul qilinadigan maydonga aylanmoqda.
