Yuridik shaxslarga «To‘xtash taqiqlangan» joylarda, aeroport va vokzal hududlarida yo‘lovchilarni olish va tushirish, pulli to‘xtash joylariga bepul kirishga ruxsat beriladi. Bu haqda hukumat qarori qabul qilindi.
Qarorga ko‘ra, yuridik shaxslarga tegishli yo‘nalishsiz taksilarga quyidagi huquqlar berildi:
- «To‘xtash taqiqlangan» belgilari amal qiluvchi joylarda, jumladan, aeroport va vokzal hududlarida yo‘lovchilarni olish va tushirish maqsadida to‘xtash;
- aeroportlar, temir yo‘l vokzallari, bozorlar va yirik savdo majmualarining pulli to‘xtash joylariga bepul kirish;
- maxsus ajratilgan jamoat transporti yo‘laklarida harakatlanish.
Shu yilning 15-aprelidan 2026-yil oxirigacha Toshkent shahrida taksi xizmatida yangi tartib joriy etiladi. Haydovchidan tashqari to‘rttadan sakkiztagacha o‘rindiqqa ega bo‘lgan yuqori qulaylikka ega transport vositalarida o‘zini o‘zi band qilgan shaxslar yo‘nalishsiz taksi xizmatlarini ko‘rsatishi mumkin bo‘ladi.
O‘zini o‘zi band qilgan taksichilar litsenziya varaqasi uchun davlat bojini BHMning 3 barobarida (1 mln 125 ming so‘m) to‘laydi.
Avvalroq Kursiv Uzbekistan 2024-yilda ayol taksichilar soni 4 baravarga oshgani haqida yozgandi.
