Belgiya Gulnora Karimovaga tegishli bo‘lishi mumkin bo‘lgan $108 millionni O‘zbekistonga qaytaradi
Belgiya telekommunikatsiya shartnomalarini tuzishda korrupsiya ishi doirasida musodara qilingan $108 mlnni O‘zbekistonga qaytaradi, deya xabar berdi qirollik prokuraturasi.
Gap Gulnora Karimovaga qarshi jinoiy ish haqida ketmoqda. U xorijiy telekommunikatsiya kompaniyalaridan O‘zbekistonda faoliyat yuritish uchun pora olganlikda aybdor deb topilgan edi.
2022-yilda O‘zbekiston Adliya vazirligi Belgiyadan Karimovaning $240 mlnlik aktivlarini qaytarishni rejalashtirayotganini ma’lum qilgan edi.
Mazkur aktivlar O‘zbekiston hukumati so‘roviga binoan musodara qilingan. Belgiyalik huquq-tartibot idoralari pul yuvish va korrupsiya sxemalari ishi bo‘yicha jami $200 mlnni musodara qilgan.
Yevropa Ittifoqi qonunlariga ko‘ra, musodara qilingan mablag‘ va undan tushgan foizlar ikki davlat o‘rtasida taqsimlanadi.
Ma’lumot uchun, Gulnora Karimova hozir koloniyada jazoni o‘tamoqda. 2022-yilda O‘zbekiston Adliya vazirligi uning boyligini $1,4 mlrd deb baholagan edi.
Eslatib o‘tamiz, avvalroq «Kvars» yana davlat nazoratiga oʻtgani haqida yozgan edik.
