O‘zbekistonda Yevropa kompaniyalari ishtirokidagi loyihalar portfeli 30 mlrd yevrodan oshdi

Bugun, 3-aprel kuni Shavkat Mirziyoyev Yevropa kengashi prezidenti Antoniu Koshta va Yevropa komissiyasi prezidenti Ursula fon der Lyayen bilan muzokaralar o‘tkazdi. Bu haqda prezident matbuot xizmati xabar berdi.

Tomonlar savdo-iqtisodiy va investitsiya sohalarida hamkorlikni rivojlantirish masalalarini muhokama qildi. Kengaytirilgan sheriklik va hamkorlik to‘g‘risida kelishuv imzolanishga tayyorlanayotgani ta’kidlandi.

O‘zbekiston va YI o‘rtasidagi tovar ayirboshlash hajmi ortib bormoqda. Yevropa kompaniyalari ishtirokidagi investitsiya portfeli 30 mlrd yevrodan oshdi. Shuningdek, Toshkentda Yevropa investitsiya bankining vakolatxonasi ochilishi haqida bitim imzolandi.

YI rahbarlari O‘zbekistonda olib borilayotgan iqtisodiy taraqqiyotni va Markaziy Osiyodagi qo‘shnichilik siyosatini yuksak baholadi.

Muzokaralarda innovatsiyalar, «yashil» energetika, tog‘-kon sanoati, qishloq xo‘jaligi, transport, raqamlashtirish bo‘yicha qo‘shma loyihalarni ilgari surish masalalariga e’tibor qaratildi.

Shuningdek, «Markaziy Osiyo – Yevropa Ittifoqi» sammiti kun tartibidagi masalalar, Yevropaning «Global darvoza» strategiyasi va Afg‘onistonning ijtimoiy-iqtisodiy rivojlanishiga ko‘maklashish borasida fikr almashildi.

Avvalroq Kursiv Uzbekistan Yevropa komissiyasi raisi Ursula fon der Leyen «O‘zA»ga bergan intervyusida sammitining asosiy mavzulari savdo, investitsiyalar, «yashil» energiya, foydali qazilmalarni qazib olish va qayta ishlash bo‘lishi haqida yozgandi.