Shotlandiyada dinozavrlarning qadimiy izlari topildi
Shotlandiyaning Skay orolida o‘tkazilgan yangi tadqiqotlar 167 mln yil avval bu hududda yirtqich megalozavrlar va o‘txo‘r sauropodlar yashaganini tasdiqladi. Bu haqda CNN axborot agentligi ma’lum qildi.
Unga ko‘ra, olimlar tomonidan topilgan qadimiy oyoq izlari bu dinozavrlar bir xil lagunada suv ichish uchun to‘planganini ko‘rsatadi.
Edinburg universiteti tadqiqotchilari 2019-yilda ilk bor uchta dinozavr izini aniqlagan bo‘lib, keyinchalik dron yordamida hududni batafsil o‘rganish natijasida jami 131 ta iz hujjatlashtirildi. Bu izlar avval baliqlarning dam olish joyi deb noto‘g‘ri talqin qilingan edi.
O‘rta Yura davrida Skay oroli subtropik iqlimga ega bo‘lib, ulkan daryo deltalari va lagunalar bilan qoplangan edi. Sauropodlar sekin harakatlanib, ignabargli daraxtlardan oziqlangan bo‘lsa, megalozavrlar laguna atrofida o‘lja izlab yurgan.
Topilgan izlar dinozavrlarning bir hududda yashaganini ko‘rsatsa-da, ular o‘zaro to‘qnash kelganiga dalil yo‘q. Olimlar Skay orolida yangi dinozavr izlarini izlash ishlarini davom ettirmoqda.
Eslatib o‘tamiz, avvalroq olimlar jundor sichqon yaratgan edi.
