Tramp O‘zbekiston mahsulotlariga boj joriy qildi

AQSh prezidenti Donald Tramp dunyoning aksariyat davlatlariga qarshi bojxona to‘lovlarini joriy etishini e’lon qildi. O‘zbekiston uchun ushbu boj stavkasi 10% etib belgilandi.

O‘zbekiston Milliy statistika qo‘mitasi ma’lumotlariga ko‘ra, 2025-yil mart oyining boshiga kelib O‘zbekiston va AQSh o‘rtasidagi savdo hajmi $142,8 mlnni tashkil etdi. 2024-yilda esa bu ko‘rsatkich $881,7 mln bo‘lgan. O‘zbekistonning ulushi $317,4 mlnni, AQShniki esa $564,3 mlnni tashkil qilgan.

Markaziy Osiyo mamlakatlari orasida eng yuqori boj to‘lovi Qozog‘istonga qo‘llanilib, u 27% etib belgilandi. Shuningdek, Ukraina uchun ham 10% miqdorida boj joriy etildi.

Shu bilan birga, Rossiya, Belarus, Meksika, Kanada va Eron ushbu bojxona cheklovlari qo‘llanilgan davlatlar ro‘yxatiga kiritilmadi.

Eslatib o‘tamiz, avvalroq Tramp qurol eksportini oshirishga qaratilgan farmonni tayyorlayotgani haqida yozgan edik.