Aprel oyi boshida AQSh prezidenti Donald Tramp yuzdan ortiq davlat tovarlarga bojlar joriy qildi. Shu jumladan, Oʻzbekistonga 10 foiz tarif joriy qilindi. Kursiv Uzbekistan bojlar Oʻzbekiston iqtisodiyotiga qanday ta’sir qilishi haqida mutaxassis fikri bilan qiziqdi.
«Biz tushunishimiz kerakki, AQSh Oʻzbekistonning eng yirik savdo sheriklari oʻntaligiga kirsa-da, uning savdodagi ulushi Rossiya va Xitoyga nisbatan juda kam», – deya izoh berdi Rossiya Fanlar akademiyasining Jahon iqtisodiyoti va xalqaro munosabatlar milliy tadqiqot instituti Markaziy Osiyo sektori rahbari Stanislav Pritchin.
Milliy statistika qoʻmitasi ma’lumotlariga koʻra, 2024-yilda Oʻzbekiston va AQSh oʻrtasida $881,7 mlnlik savdo amalga oshirilgan. Xitoy va Rossiya bilan tovar ayirboshlash mos ravishda $12,4 mlrd va $11,6 mlrdni tashkil etdi.
Pritchinning qoʻshimcha qilishicha, Oʻzbekistondan AQShga eksport qilinadigan mahsulotlarning aksariyati uran boʻlib, tariflar uning narxini oshirishi mumkin, chunki Qoʻshma Shtatlar uranning 95 foizini import qiladi.
Trampning tariflari Oʻzbekiston uchun signal boʻlishi mumkin. Chunki mamlakat JSTga aʼzo emas. AQSh esa istalgan vaqtda xalqaro tashkilotlarning sanksiyalaridan qoʻrqmasdan tariflarni joriy qilishi mumkin.
Shu bilan birga, ekspertning fikricha, Oʻzbekiston oʻzining asosiy eksport tovarlarini qoʻllab-quvvatlashi va himoya qilishi, zarurat tugʻilganda esa bosimga nisbatan simmetrik choralar koʻrishi lozim.
Xalqaro savdo kelishuvlar va aniq qoidalar asosida qurilgani uchun AQSh hamkorlari ham xuddi shunday choralar koʻradi.
«Bir zumda barcha savdo hamkorlaringizga nisbatan juda ko‘p turdagi mahsulotlarga boj soliqlarini joriy qilib bo‘lmaydi. Bu shubhasiz, AQSh tashqi savdosiga jiddiy zarba bo‘ladi», – deya yakunladi Pritchin.
Eslatib oʻtamiz, Kursiv Uzbekistan nashri Tramp Oʻzbekiston mahsulotlariga boj joriy qilgani haqida yozgan edi.
