11,25 mln so‘mdan yuqori pul o‘tkazmalari nazorat ostiga olinadi
28-mart kuni noqonuniy daromadlarni legallashtirishga qarshi kurashish bo‘yicha yangi ichki nazorat qoidalari ro‘yxatdan o‘tkazildi. Bu haqda Adliya vazirligi xabar berdi.
Yangi tartibga ko‘ra, endilikda to‘lov xizmatlari va elektron pul tizimlari orqali amalga oshiriladigan yirik pul o‘tkazmalari shaxsiy ma’lumotlar bilan rasmiylashtiriladi.
To‘lov tashkilotlari mobil ilovalarida hisob ochayotgan mijozlarni sinchiklab tekshiradi. Elektron terminal (E-POS)dan foydalanmoqchi bo‘lgan tadbirkorlar ham maxsus tekshiruvdan o‘tadi.
BHMning 30 baravari (11,25 mln so‘m) yoki undan ko‘proq summadagi pul o‘tkazmalari, jo‘natuvchi va oluvchining shaxsiy ma’lumotlari bilan birga amalga oshiriladi. Agar akkauntsiz BHMning 500 baravari (187,5 mln so‘m) yoki undan ortiq miqdor pul o‘tkazilsa, bu holatda ham majburiy tekshiruv amalga oshiriladi.
Ushbu jarayonda jismoniy shaxslardan pasport yoki ID-karta seriyasi, raqami, tug‘ilgan sana va joyi, yuridik shaxslardan esa tashkilot nomi va STIR raqami talab etiladi.
Agar pulni qabul qiluvchining banki jo‘natuvchining ma’lumotlarini boshqa manbalardan ololsa, faqat JSHSHIR yoki operatsiya identifikatori yetarli bo‘ladi.
Har bir tranzaksiya tavakkalchilik darajasiga qarab alohida baholanadi. To‘lov xizmatlari o‘z tizimlarida shaxsiy ma’lumotlar aniqligini har bir element bo‘yicha belgilaydi.
Avvalroq «Kursiv» Kaspi.kz O‘zbekistonning Uzcard va Humo kartalariga pul o‘tkazish imkoniyatini yaratgani haqida yozgandi.
