AQSh bozorida O‘zbekiston mahsulotlariga talab oshishi kutilmoqda

AQSh hukumati joriy qilgan yangi bojxona tariflari global savdoga jiddiy ta’sir o‘tkazishi mumkin, biroq O‘zbekiston uchun yangi eksport imkoniyatlarini ochishi ehtimoli ham bor. Bu haqda prezidentning JST bo‘yicha maxsus vakili Azizbek Urunov o‘z LinkedIn sahifasida ma’lum qildi.

Unga ko‘ra, AQSh bojxona tariflari uch toifaga ajratilgan bo‘lib, O‘zbekiston 10% qo‘shimcha boj stavkasi joriy etilgan mamlakatlar qatoriga kiritildi. Biroq asosiy global ishlab chiqaruvchilar, jumladan, Xitoy (64%), Vyetnam (46%) va Hindiston (26%) uchun yanada yuqori tariflar belgilandi.

Bu holat O‘zbekistonning qiyosiy ustunlikka ega bo‘lgan tarmoqlari, xususan, to‘qimachilik va tayyor mahsulotlar eksporti uchun yangi imkoniyatlar yaratishi mumkin. Shuningdek, AQSh bozorida raqobatchi davlatlarning mahsulotlari qimmatlashgani sababli O‘zbekiston mahsulotlariga talab oshishi kutilmoqda.

Garchi AQShning bu qarori jahon savdosiga bosim o‘tkazsa-da, O‘zbekiston o‘z ishlab chiqarish va eksport salohiyatini oshirish orqali bu vaziyatdan foyda olishi mumkin.

Eslatib o‘tamiz, avvalroq Trampning tariflari savdo urushini qo‘zg‘atishi mumkinligi haqida yozgan edik.