«Chirchiq» texnoparkining 53% mahsuloti eksport qilindi

«Chirchiq» texnoparki Tataristonning «Ximgrad» texnopolisi ko‘magida 2024-yilda ishlab chiqarilgan mahsulotning 53 foizini eksport qildi. Bu haqda TASS nashri ma’lum qildi.

«Loyiha faqat O‘zbekiston ichida emas, balki Markaziy Osiyodagi qo‘shni mamlakatlar uchun ham faoliyat yuritmoqda. Jumladan, Tojikiston, Qirg‘iziston va Qozog‘iston bozorlariga yetib borganmiz. Bizning korxonalar ushbu bozorlarda o‘zlarini qulay his qilmoqda», – dedi «Ximgrad» bosh direktori Ayrat Gizzatullin.

Hozirgi kunda «Chirchiq» texnoparki hududida 19 ta kompaniya faoliyat yuritmoqda, ular kimyo mahsulotlari va qog‘oz ishlab chiqarish bilan shug‘ullanadi. Shulardan to‘rtta kompaniya rezident maqomiga ega.

Ma’lumot uchun, «Chirchiq» texnoparki 2022-yil mart oyining oxirida ochilgan bo‘lib, uning tashkil etilishida «Ximgrad» texnopolisining yordami katta bo‘lgan. 2023-yil dekabr holatiga ko‘ra, texnopark rezidentlari $27 mlnlik investitsiyalarni jalb qilgan.

Eslatib o‘tamiz, avvalroq IT Park Uzbekistan va Qozog‘istonning Astana Hub texnoparki Shanxayda xalqaro markaz ochishi haqida yozgan edik.