Avto

Leapmotor muhandislari avtomobilni qayta sinovdan o‘tkazish uchun O‘zbekistonga keladi

Leapmotor muhandislari avtomobilni qayta sinovdan o‘tkazish uchun O‘zbekistonga keladi / Foto: Leapmotor

Xitoyning Leapmotor avtomobil brendi mutaxassislari mahsulotni qayta sinovdan o‘tkazish uchun O‘zbekistonga keladi. Bu haqda Texnik jihatdan tartibga solish sohasida nazorat inspeksiyasi ma’lum qildi.

Dastlabki sinovlar chog‘ida Leapmotor C16 avtomobilida nuqson aniqlandi. Mashina uskunalari kuchli elektromagnit shovqinlarni keltirib chiqarib, elektronika ishida nosozliklarga va hatto asosiy boshqaruv tizimlarining ishdan chiqishiga sabab bo‘lishi mumkin edi.

Mazkur avtomobil xalqaro xavfsizlik standartlariga mos emas deb topildi. Inspeksiya brendning barcha yengil avtomobillarini sertifikatsiyalash jarayonini to‘xtatishni talab qildi.

2024-yil 1-noyabrdan boshlab import qilingan avtomobillar Toshkent viloyatining Piskent poligonida sinovdan o‘tkazilmoqda. Endilikda sinovlardan nafaqat rasmiy avtomobil dilerlari, balki shaxsiy ehtiyojlar uchun xorijiy avtomobil olib kirgan fuqarolar ham o‘tishi shart. Yangi tartib joriy etilgach avtomobil egalari sinovga yozilishdagi muammolar va navbatlarning uzunligi borasida bir necha bor shikoyat qilishdi.

Eslatib o‘tamiz, avvalroq O‘zbekistonda Leapmotor avtomobillarining sertifikatsiyasi vaqtincha to‘xtatilgan edi.