Markaziy Osiyo va Yevropa Ittifoqi o‘rtasidagi tovar ayirboshlash hajmi 54 mlrd yevroga yetdi
4-aprel kuni Samarqandda prezident Shavkat Mirziyoyev raisligida «Markaziy Osiyo – Yevropa Ittifoqi» birinchi sammiti bo‘lib o‘tdi. Bu haqda Kursiv Uzbekistan muxbiri ma’lum qildi.
Davlat rahbari mintaqa va Yevropa Ittifoqi o‘rtasidagi hamkorlikni yangi bosqichga olib chiqish, strategik sheriklikni huquqiy asoslar bilan mustahkamlash bo‘yicha muhim tashabbuslar ilgari surdi. Jumladan, ikki mintaqa o‘rtasida to‘laqonli sheriklik bitimini imzolash taklif etildi.
Tadbirda Yevropa kengashi prezidenti Antoniu Koshta, Yevropa komissiyasi prezidenti Ursula fon der Lyayen, Markaziy Osiyo mamlakatlari rahbarlari va yirik xalqaro moliya institutlari vakillari ishtirok etdi. Muloqot chog‘ida investitsiyalarni jalb qilish, tovar ayirboshlash hajmini oshirish, «yashil» energetika, transport va raqamlashtirish sohalarida hamkorlikni kengaytirish masalalari muhokama qilindi.
Shavkat Mirziyoyev mintaqaviy integratsiyaning faollashganini ta’kidlab, Markaziy Osiyo davlatlari o‘rtasidagi iqtisodiy va savdo aloqalar sezilarli darajada kengayganini qayd etdi. Xususan, so‘nggi yillarda mamlakatlar o‘rtasidagi tovar ayirboshlash hajmi 54 mlrd yevroga yetdi.
O‘zbekiston prezidenti Toshkentda mintaqaviy sanoat parki tashkil etish, Yevropa investitsiya banki ofisini ochish, qo‘shma savdo palatasini ishga tushirish kabi muhim takliflarni ilgari surdi. Bundan tashqari, «Markaziy Osiyo – Yevropa Ittifoqi» formatida parlamentlararo forum va investitsiya platformasini yo‘lga qo‘yish tashabbusini ilgari surdi.
Avvalroq Kursiv Uzbekistan Toshkentda ilk bor «Markaziy Osiyo – Yevropa Ittifoqi» parlamentlararo hamkorlik forumi o‘tkazilishi haqida xabar bergan edi.
