O‘zbekiston U-17 Osiyo kubogida Tailand ustidan ishonchli g‘alabaga erishdi

3-aprel kuni Saudiya Arabistonining Taif shahridagi Okaz stadionida bo‘lib o‘tgan «U-17» Osiyo kubogi guruh bosqichi doirasida O‘zbekiston o‘smirlar terma jamoasi tailandlik tengqurlarini 4:1 hisobida mag‘lub etdi.

O‘zbekiston jamoasi o‘yinning dastlabki daqiqalaridanoq ustunlikni qo‘lga kiritdi. 2-daqiqada Sayfiddin Sodiqov uzatmasidan foydalangan holda Sadriddin Xasanov hisobni ochdi. 13-daqiqada yana Sodiqov assistentligida Nurbek Sarsenbayev ikkinchi golni kiritdi.

Tailand jamoasi 40-daqiqada Natthakit Phosri tomonidan amalga oshirilgan uzatma natijasida Silva Mexesning goli bilan javob qaytardi va hisobni 2:1 ko‘rinishiga keltirdi.

Ikkinchi bo‘limda O‘zbekiston jamoasi o‘z ustunligini mustahkamladi. 80-daqiqada Asilbek Aliev uchinchi golni kiritdi. 85-daqiqada esa Azizbek Erimbetovning uzatmasidan so‘ng Abubakir Shukurullaev hisobni 4:1 ko‘rinishiga keltirdi.

Ushbu g‘alaba natijasida O‘zbekiston U-17 terma jamoasi guruhda 3 ochko bilan birinchi o‘rinni egalladi. Tailand U-17 jamoasi esa ochkosiz holda to‘rtinchi o‘rinda qoldi.

Eslatib o‘tamiz, avvalroq Husanov sabab Markaziy Osiyo futboliga qiziqish oshgani haqida yozgan edik.