O‘zbekistonda Butunjahon tozalik kuni o‘tkazilishi mumkin

Shavkat Mirziyoyev 4-aprel kuni Samarqand iqlim forumi doirasida BMT Bosh kotibi o‘rinbosari, BMTning aholi punktlari bo‘yicha dasturi (BMT-Habitat) ijrochi direktori Anaklaudiya Rossbaxni qabul qildi. Bu haqda davlat rahbari matbuot xizmati ma’lum qildi.

Unga ko‘ra, uchrashuvda urbanizatsiya sohasida BMT bilan hamkorlikni kengaytirish masalalari muhokama qilindi. BMT vakili O‘zbekistonda «aqlli» va «yashil» shaharlarni rivojlantirishga qaratilgan islohotlarni ijobiy baholadi.

Shuningdek, shaharlarda zamonaviy raqamli texnologiyalarni joriy etish, «yashil» qurilish standartlarini ishlab chiqish va iqlim o‘zgarishiga moslashish bo‘yicha maxsus dasturlarni amalga oshirish muhimligi ta’kidlandi.

Uchrashuvda O‘zbekistonda Butunjahon tozalik kunini o‘tkazish va Toshkentda BMT-Habitat ofisini ochish masalalari ham muhokama qilindi. Tomonlar hamkorlik bo‘yicha «Yo‘l xaritasi»ni qabul qilishga kelishib oldilar.

Eslatib o‘tamiz, avvalroq Yevropa Ittifoqidagi sayyohlar uchun yagona Markaziy Osiyo vizasi tashkil etilishi haqida yozgan edik.