Yangiliklar

Prezident Markaziy Osiyo davlatlari rahbarlari bilan uchrashdi

Uchrashuvlar Samarqandda bo‘lib o‘tgan birinchi «Markaziy Osiyo – Yevropa Ittifoqi» sammiti doirasida tashkil etildi
Foto: President.uz

3-aprel kuni Samarqanddagi «Markaziy Osiyo – Yevropa Ittifoqi» birinchi sammiti doirasida O‘zbekiston prezidenti Shavkat Mirziyoyev va Markaziy Osiyoning qo‘shni davlatlari rahbarlari o‘rtasida muzokaralar bo‘lib o‘tdi. Bu haqda davlat rahbari matbuot xizmati ma’lum qildi.

Unga ko‘ra, Tojikiston prezidenti Emomali Rahmon bilan uchrashuv chog‘ida tomonlar 31-mart kuni Xo‘jandda o‘tgan uch tomonlama uchrashuv natijalarini muhokama qildilar. Yetakchilar chegara masalalarining to‘liq hal etilishi muhimligini ta’kidladilar.

Shuningdek, ular erishilgan kelishuvlarning amalga oshirilish natijalarini, jumladan, tovar ayirboshlash hajmini oshirish va hamkorlik loyihalarini tezlashtirish masalalarini ko‘rib chiqdilar.

Foto: President.uz

Qirg‘iziston prezidenti Sadir Japarov bilan uchrashuvda sanoat, transport, energetika va infratuzilma sohalaridagi loyihalarni jadallashtirish hamda madaniy-gumanitar almashinuvni davom ettirish masalalari muhokama qilindi.

Foto: President.uz

Bundan tashqari, Shavkat Mirziyoyev Qozog‘iston prezidenti Qosim-Jomart Toqayev bilan ham muzokaralar o‘tkazdi. Uchrashuvda ikki davlat o‘rtasidagi strategik hamkorlikni mustahkamlash masalalari ko‘rib chiqildi.

Davlat rahbarlari tovar ayirboshlash hajmini oshirish va iqtisodiy loyihalarni ilgari surish bo‘yicha chora-tadbirlarni qabul qilishga kelishib oldilar. Shuningdek, Xalqaro sanoat kooperatsiyasi markazini ishga tushirish va mintaqaviy masalalarni muhokama qildilar.

Eslatib o‘tamiz, avvalroq Mirziyoyev Turkmaniston prezidenti Serdar Berdimuhamedov bilan uchrashgan edi.