Nechta hudud jadal kompleks asosida rivojlantiriladi

1-aprel kuni qabul qilingan prezident qarori bilan respublikaning 16 ta tuman va shahrini jadal kompleks rivojlantirishning asosiy maqsadlari belgilandi. Bu haqda Adliya vazirligi xabar berdi.

Unga ko‘ra, sanoat ishlab chiqarishi 7–8 foizga, xizmatlar hajmi 15–17 foizga, qishloq xo‘jaligi ishlab chiqarishi esa 4–5 foizga oshiriladi. Ishsizlik darajasi 4–5 foizga, kambag‘allik esa 5–6 foizga kamaytiriladi. Qo‘ng‘irot, Asaka, G‘allaorol, Denov tumanlari va Marg‘ilon shahri ishsizlik va kambag‘allikdan xoli hududlarga aylantiriladi.

Shu yilning 1-iyuligacha 10-yildan ortiq vaqt oldin ishlab chiqilgan bosh rejalarni yangilanib, shahar markazlarini 3 zonaga: renovatsiya, rekonstruksiya va konservatsiyaga ajratiladi. Jarayonlarda aholi va tadbirkorlar takliflari inobatga olinadi.

Ushbu master reja loyihalari bilan Asaka, G‘ijduvon, G‘allaorol, Xatirchi, Chortoq, Sirdaryo, Denov, Quva, Shovot tumanlari hamda Yangiyo‘l shahri markazlarida yashash, dam olish, xizmat ko‘rsatish va tadbirkorlik uchun qulay sharoitlar yaratiladi. Xatirchi, Quva va Chortoq tumanlarida turizmni rivojlantirish bo‘yicha alohida master rejalar ishlab chiqiladi.

2026-yil 1-yanvarga qadar dastur doirasidagi hokimliklarda «Aholi va tadbirkorlar manfaatlariga xizmat qilish» tamoyiliga asoslangan yangi Loyiha ofislari tashkil etiladi.

Avvalroq Kursiv Uzbekistan 2025-yilda 2 million nafar ayolning bandligini ta’minlash belgilangani haqida yozgandi.