Samarqandda «Markaziy Osiyo – Yevropa Ittifoqi» birinchi sammiti boshlandi
Bugun Samarqand shahrida «Markaziy Osiyo – Yevropa Ittifoqi» formatidagi birinchi sammit o‘z ishini boshladi. Bu haqda ayni damda ushbu sammitda bo‘lib turgan Kursiv Uzbekistan muxbiri ma’lum qildi.
Tadbirda O‘zbekiston prezidenti Shavkat Mirziyoyev delegatsiyalar rahbarlarini samimiy qutlab, ushbu uchrashuv mintaqaviy hamkorlik va xalqaro munosabatlarni mustahkamlashda muhim ahamiyat kasb etishini ta’kidladi.
Sammit doirasida Markaziy Osiyo davlatlari va Yevropa Ittifoqi o‘rtasidagi ko‘p tomonlama hamkorlikni rivojlantirish hamda mustahkamlash, shuningdek, mintaqaviy va xalqaro muammolar yuzasidan fikr almashishga qaratilgan qator masalalar muhokama qilinadi.
Sammit kun tartibiga quyidagilar kiradi:
- savdo-iqtisodiy va sarmoyaviy aloqalarni mustahkamlash;
- muqobil energiya manbalarini qo‘llash va «yashil» iqtisodiyotni rivojlantirish bo‘yicha hamkorlik;
- transport va raqamli aloqani yaxshilash bo‘yicha hamkorlik;
- migratsiya masalalari bo‘yicha hamkorlik;
- madaniy-gumanitar va turizm almashinuvini kengaytirish.
Ayni paytda sammit doirasida ishtirokchi delegatsiyalar rahbarlari kun tartibidagi masalalar yuzasidan so‘zga chiqmoqda.Tadbir yakunida tomonlar o‘zaro manfaatli hamkorlikni mustahkamlash bo‘yicha Qo‘shma deklaratsiyani qabul qilishni rejalashtirgan.
Avvalroq Kursiv Uzbekistan «Markaziy Osiyo – Yevropa Ittifoqi» sammitida qaysi hujjatlar imzolanishi haqida xabar bergan edi.
