Chirchiq shahrida Toshkent viloyati hokimi Zoyir Mirzayev tadbirkorlar bilan ochiq muloqot o‘tkazdi. Unda viloyatdagi 300 dan ortiq tadbirkorlar ishtirok etdi, 180 nafari bevosita hokim bilan muloqotda bo‘ldi, deya xabar berdi hokimlik matbuot xizmati.
Unga ko‘ra, muloqot davomida huquq-tartibot, qurilish va kommunal sohalardagi murojaatlar o‘rganildi. Hokim tadbirkorlar bilan ochiq muloqot qilish madaniyatini yo‘lga qo‘yish muhimligini ta’kidladi.
Shuningdek, ilgari berilgan topshiriqlarning ijrosi tanqidiy ko‘rib chiqildi, ijro intizomi qoniqarsiz deb baholandi. Endilikda har bir murojaat alohida nazorat ostida ko‘rib chiqiladi.
Joylarda «Viloyat hokimiga murojaat» maxsus qutilari tashkil etiladi, ularni faqat hokimning o‘zi ochadi va har bir murojaat bo‘yicha qat’iy tartibda chora ko‘riladi.
Eslatib o‘tamiz, avvalroq «Chirchiq» texnoparkining 53% mahsuloti eksport qilingani haqida yozgan edik.
