Yevropa Ittifoqi Markaziy Osiyoga 12 mlrd yevro ajratadi

Yevropa Kengashi prezidenti Antonio Koshta Markaziy Osiyo va Yevropa Ittifoqi o‘rtasidagi hamkorlik mustahkamlanib borayotganini ta’kidladi. Bu haqda u matbuot anjumanida ma’lum qildi, deb xabar bermoqda Kursiv Uzbekistan muxbiri.

Uning so‘zlariga ko‘ra, YeI Markaziy Osiyo bilan iqtisodiy aloqalar, savdo va investitsiyalarni yanada kengaytirishga intilmoqda. Koshta bu borada YeI tomonidan katta mablag‘ ajratilishini qayd etdi:

«Biz Global Gateway tashabbusi doirasida mintaqa uchun 12 milliard yevrodan ortiq mablag‘ yo‘naltiryapmiz» – dedi Koshta.

Shuningdek, Koshta YeI O‘zbekiston bilan hamkorlik shartnomasini shu yilda Tojikiston bilan esa kelasi yilda imzolashni rejalashtirayotganini ma’lum qildi. Uning ta’kidlashicha, YeI Markaziy Osiyo uchun ishonchli hamkor bo‘lib, transport aloqalarini mustahkamlash, suv resurslari boshqaruvi, qishloq xo‘jaligi, yashil iqtisodiyot va energiya o‘tish jarayonlarini qo‘llab-quvvatlashni maqsad qilgan.

U, shuningdek, xavfsizlik masalalariga to‘xtalar ekan, Afg‘onistondagi vaziyat va Rossiyaning Ukrainaga tajovuzi mintaqaviy barqarorlikka tahdid solayotganini ta’kidladi. Koshta so‘zining yakunida bu sammit yakuniy bosqich emas, balki uzoq muddatli strategik hamkorlik sari yo‘nalgan yo‘l ekanini bildirdi.

Avvalroq Kursiv Uzbekistan Markaziy Osiyo va Yevropa Ittifoqi o‘rtasidagi tovar ayirboshlash hajmi 54 mlrd yevroga yetgani haqida xabar bergan edi.