Daily supermarket tarmog‘i Toshkentda birinchi filialini ochdi

Gruziyaning Daily chakana savdo tarmog‘i Toshkentda birinchi supermarketini ochdi. Bu haqda Bussiness week nashri xabar berdi.

31-mart kuni kompaniya Toshkentda birinchi supermarketini ochdi. Ushbu qadam kompaniyaning 2024-yil dekabrda Fransiyaning Schiever Group’dan bi1 tarmog‘ini sotib olganidan so‘ng boshlandi.

Yangi do‘kon bi1 tarmog‘ining 34-do‘koni bo‘lib, Daily brendi ostida ishlayotgan birinchi supermarket hisoblanadi. Daily Gruziya chakana savdo brendlari orasida ham birinchilardan bo‘lib xorijda o‘z faoliyatini yo‘lga qo‘ygan do‘kon bo‘ldi.

Ma’lumot uchun, Daily Group Gruziyaning tez aylanadigan iste’mol tovarlari (FMCG) sohasida yetakchilarda biri. Kompaniya mamlakat bo‘ylab 1,7 mingga yaqin do‘konlar tarmog‘iga ega. Unda kuniga 650 mingdan ortiq mijozlarga xizmat ko‘rsatiladi.

Kompaniya Zedazen, RS Cola, Miller va boshqa taniqli ichimliklar brendlarini ishlab chiqaradigan Gruziya pivo kompaniyasiga egalik qiladi.

Avvalroq Kursiv Uzbekistan Rossiyaning «Yobidoyobi» sushi tarmog‘i Toshkentda ish boshlagani haqida yozgandi.