Iqlim muammosini hal qilishda «Me First» tamoyili muhim rol o‘ynashi kerak

Toshkentda bo‘lib o‘tayotgan xalqaro iqlim forumi doirasida Janubiy koreyalik ekspert, iqlim o‘zgarishi bo‘yicha Nobel Tinchlik mukofoti laureati Raegwon Jung Parij iqlim kelishuvining amaldagi kamchiliklari va ularni bartaraf etish yo‘llari haqida fikr bildirdi. Bu haqda Kursiv Uzbekistan muxbiri ma’lum qildi.

«Parij iqlim kelishuvi hozirgi holatda samarali emas, muammolari ko‘p. Ularning yechim topmasligi butun global iqlim harakatlarini zaiflashtiradi», – deya ta’kidladi Jung.

Uning so‘zlariga ko‘ra, Parij kelishuvi yuqoridan pastga – hukumatlardan biznesga yo‘naltirilgan, biroq bu yetarli emas.

«Endi pastdan yuqoriga – ya’ni oddiy fuqarolarni, iste’molchilarni jalb qiluvchi yondashuv kerak. Hamma, har bir inson mas’uliyatni o‘z zimmasiga olishi lozim», – dedi u.

Ekspert forumda yangi «Me First» (Dastlab Men) kampaniyasini ilgari surishini ma’lum qildi.

«‘Me First’ degani – men birinchi bo‘lib mas’uliyatni o‘z zimmamga olaman. Bu PDC – Personally Determined Contribution – ya’ni shaxsiy belgilangan hissa degan yondashuvdir», – deya tushuntirdi Jung.

U bu tashabbusni hukumatlar tomonidan belgilanadigan NDC (Nationally Determined Contribution – milliy belgilangan hissa) ga muqobil, kuchliroq uslub deb hisoblaydi:

«Faqat hukumatdan kutib o‘tirmasligimiz kerak. Har bir inson, har bir iste’molchi bu jarayonda faol ishtirok etishi zarur. Chunki iqlim o‘zgarishiga qarshi kurash hammamizning ishtirokimizsiz samara bermaydi», – dedi u.

Avvalroq Kursiv Uzbekistan o‘rmonlar va degradatsiyaga uchragan yerlarni tiklash uchun $153 mln miqdorida moliyaviy yordam ajratilishi haqida xabar bergan edi.