O‘zbekiston quyosh energiyasi bo‘yicha katta salohiyatga ega
Samarqand xalqaro iqlim forumida ishtirok etayotgan Xalqaro qishloq xo‘jaligi universiteti amerikalik professori Maykl Brodi mamlakatning quyosh energiyasi borasidagi yutuqlari va suv resurslarini boshqarishdagi muhim masalalar haqida Kursiv Uzbekistan’ga bergan intervyusida aytib o‘tdi.
«Quyosh va shamol energiyasi ko‘mirni almashtirsa, ayniqsa Toshkent kabi yirik shaharlarda havo sifati ancha yaxshilanadi. Bu esa aholining sog‘lig‘i uchun muhim taraqqiyot bo‘ladi», – dedi Brodi.
U, shuningdek, Markaziy Osiyodagi suv resurslarining kelajagi borasida katta noaniqliklar mavjudligini ta’kidlab, bunga qanday javob berish kerakligini forumda muhokama qilishini bildirdi:
«Biz yangi suv infratuzilmasini, ilg‘or sug‘orish tizimlarini qurish haqida o‘ylashimiz kerak. Iqlim o‘zgarishlariga moslashish qimmatga tushishi mumkin, shuning uchun iqtisodiy va ilmiy tahlil asosida harakat qilish zarur», – dedi u.
Brodi hozirda Toshkentdagi Xalqaro qishloq xo‘jaligi universitetida dars berayotgani va AQSHdagi American University nomidan ushbu forumga taklif etilganini ham qayd etdi.
O‘zbekiston quyosh energiyasini rivojlantirishda to‘g‘ri yo‘ldan ketayotgani haqida fikr bildirar ekan, Brodi shunday dedi:
«Bu yerda quyosh nurlari juda ko‘p, salohiyat ham katta. Quyosh energiyasi bu yer uchun juda muhim va bu borada ijobiy taraqqiyot ko‘rinmoqda».
Avvalroq Kursiv Uzbekistan mamlakatda «Butunjahon tozalik kuni» o‘tkazilishi mumkinligi haqida xabar bergan edi.
