Parkentda $30 mlnlik akvapark ishga tushadi

Toshkent viloyatining Parkent tumanida umumiy qiymati $30 mlnlik akvapark 2026-yilning 2-choragida ishga tushadi. Bu haqda viloyat hokimligi matbuot xizmati xabar berdi.

Qayilma mahallasi hududida 20 gektar maydonda zamonaviy attraksionlar bilan jihozlangan yangi akvapark qurilishi loyihasining taqdimoti o‘tkazildi.

Loyihaning umumiy qiymati $30 mlnni tashkil etadi. Bu majmua savdo va xizmat ko‘rsatuvchi nuqtalar, amfiteatr, yopiq suzish havzasi, attraksionlar, mehmonxona, sun’iy to‘lqinli suzish havzasi, favvora hamda avto turargohdan iborat bo‘ladi. Loyiha bilan yiliga 100 ming sayyohni jalb qilish rejalashtirilgan.

Obyekt 2026-yilning 2-choragida ishga tushishi kutilmoqda va bu loyiha 500 dan ziyod yangi ish o‘rinlarini yaratadi. Viloyat hokimi Zoyir Mirzayev park qurilishi uchun yer maydonlari olingan fermerlarga to‘lanadigan kompensatsiya mablag‘lari qonunchilikka binoan, o‘zaro kelishuv va xolis, adolatli baholanib berilishini ta’kidladi.

Avvalroq Kursiv Uzbekistan Toshkent viloyatida biznes vakillarining murojaatlari uchun quticha oʻrnatilishi haqida yozgandi.