2-aprel kuni poytaxtdagi avtobuslarda chiptasiz harakatlangan 162 nafar yo‘lovchiga ma’muriy bayonnomalar rasmiylashtirilgan. Bu haqda Transport vazirligi xabar berdi.
2025-yil 1-yanvardan boshlab Toshkent avtobuslarida naqd pulda to‘lov qilish amaliyoti to‘liq bekor qilingan bo‘lib, yo‘lovchilar elektron to‘lov yoki bir martalik QR-chiptalar yordamida to‘lovni amalga oshirishlari talab etiladi.
Transport nazorati inspeksiyasi inspektorlari va Yo‘lovchi tashishni monitoring va nazorat qilish davlat muassasasi nazoratchilari tomonidan, avtobuslarda yo‘l haqini to‘lamasdan harakatlanayotgan yo‘lovchilarga nisbatan kuchaytirilgan reyd tadbirlari o‘tkazilmoqda. Shu yilning 2-aprel kuni davomida shahardagi avtobuslarda 162 nafar chiptasiz harakatlangan yo‘lovchilar aniqlanib, ma’muriy bayonnomalar rasmiylashtirilgan.
Ma’lumot uchun, Ma’muriy javobgarlik kodeksining 144-moddasiga ko‘ra, naqd pul bergan yo‘lovchilar emas, balki chiptasiz yurganlarga BHMning o‘ndan bir qismi miqdorida (hozirda 37,5 ming so‘m) jarima solinadi.
Yo‘l haqini 1700 so‘m evaziga bank kartalari, mobil ilovalar yoki ATTO transport va virtual kartalari orqali amalga oshirishingiz tavsiya etiladi. Elektron to‘lov tizimi vaqtingiz va mablag‘ingizni tejashga yordam beradi. Qolaversa, naqd pul evaziga maxsus Paynet, Oson va MultiPay infokiosklari orqali QR-kodli bir martalik chiptalarni xarid qilish mumkin.
Avvalroq Kursiv Uzbekistan Toshkent avtobuslarida yo‘l haqini to‘lamaganlar 37 ming so‘m jarima to‘lashi haqida yozgandi.
