Xitoy AQSh tovarlariga 34% boj joriy qilmoqda

10-apreldan boshlab Xitoy Amerika tovarlariga 34% boj joriy etadi. Bu haqda XXR moliya vazirligi xabar berdi.

Shu bilan birga, Pekin AQShga eksport qilinadigan bir qator kamyob yer elementlari, samariy, gadoliniy, terbiy va disproziy kabi strategik ahamiyatga ega materiallarni cheklashni rejalashtirmoqda.

Bundan maqsad milliy xavfsizlikni ta’minlash va xalqaro majburiyatlarni bajarishdan iborat. 4-apreldan boshlab kuchga kirgan ushbu cheklovlar, ayniqsa, Xitoyning texnologik rivojlanishiga ta’sir qiluvchi materiallar eksportining kamayishiga olib kelishi mumkin.

Shuningdek, AQShning 11 ta kompaniyasi Xitoyning «ishonchsiz» tashkilotlar ro‘yxatiga kiritildi, bu esa Xitoyning ushbu kompaniyalarga nisbatan iqtisodiy sanksiyalar joriy etish huquqini beradi.

Xitoyning rasmiy vakillari Vashingtonni bir tomonlama choralarni bekor qilishga va teng huquqli, o‘zaro manfaatli muloqotga qaytishga chaqirgan. Pekin, shuningdek, Trampning savdo tariflari xalqaro savdo qoidalarini buzish va global iqtisodiy rivojlanishga tahdid solayotganini ta’kidladi.

Avvalroq, 3-aprel kuni AQSh prezidenti Donald Tramp dunyoning aksariyat davlatlariga qarshi bojxona to‘lovlarini joriy etishini e’lon qilgandi. O‘zbekiston uchun ushbu boj stavkasi 10% etib belgilandi.

Markaziy Osiyo mamlakatlari orasida eng yuqori boj to‘lovi Qozog‘istonga qo‘llanilib, u 27% etib belgilandi. Shuningdek, Ukraina uchun ham 10% miqdorida boj joriy etildi.

Shuningdek, «Kursiv» bu bojlar Oʻzbekiston iqtisodiyotiga qanday ta’sir qilishi haqida mutaxassis fikri bilan qiziqdi.

«Biz tushunishimiz kerakki, AQSh Oʻzbekistonning eng yirik savdo sheriklari oʻntaligiga kirsa-da, uning savdodagi ulushi Rossiya va Xitoyga nisbatan juda kam», – deya izoh berdi Rossiya Fanlar akademiyasining Jahon iqtisodiyoti va xalqaro munosabatlar milliy tadqiqot instituti Markaziy Osiyo sektori rahbari Stanislav Pritchin.

Avvalroq «Kursiv» AQSh bozorida O‘zbekiston mahsulotlariga talab oshishi kutilayotgani haqida yozgandi.