Ilon Mask Trampdan savdo bojlarini bekor qilishni soʻradi – The Washington Post

Tesla rahbari Ilon Mask AQSh prezidenti Donald Trampga toʻgʻridan toʻgʻri murojaat qilib, import uchun yangi savdo bojlarini bekor qilishni soʻradi. Bu haqda The Washington Post manbalarga tayanib xabar berdi.

Bloomberg nashrining yozishicha, Trampning asosiy ittifoqchilaridan biri boʻlgan Mask siyosiy faollikdan aziyat chekdi. Yil boshidan beri Tesla kapitallashuvining uchdan biri yoʻqotildi va milliarderning boyligi noyabr oyidan beri birinchi marta $300 milliarddan pastga tushdi.

Mask Oq uyning asosiy maslahatchilaridan birini chetlab oʻtib, toʻgʻridan toʻgʻri Tramp bilan bojlarni bekor qilish boʻyicha kelishib olishga harakat qildi. Biroq uning urinishi muvaffaqiyatga erishmadi. 7-aprel kuni Maskning murojaatidan soʻng Tramp allaqachon e’lon qilingan 34 foizlik stavkaga qoʻshimcha ravishda Xitoy importiga 50 foizlik qoʻshimcha bojlar joriy etish bilan tahdid qildi.

Respublikachilarning qoʻllab-quvvatlashi va siyosiy faolligiga qaramay, Mask bojlar joriy etilishiga qarshi boʻlgan asosiy shaxslardan biriga aylandi. Shunga qaramay, Tesla boshqa avtomobil ishlab chiqaruvchilarga qaraganda kamroq zarar koʻradi, chunki Amerikaning ichki bozorida uning avtomobillari yigʻiladi.

Ma’lumot uchun, 8-aprel kuni ertalabki savdolarda Tesla aksiyalari 3,9 foizga oshdi.

Avvalroq Kursiv Uzbekistan Yevrokomissiya bir qator Amerika tovarlariga 25 foizlik bojlarni joriy etishni taklif qilgani haqida xabar bergan edi.