Tramp Xitoyga 50 foizlik yangi bojlar bilan tahdid qilmoqda

AQSh prezidenti Donald Tramp Xitoyga 50 foizlik yangi boj solishini aytdi. Bu tahdid Pekin AQShga nisbatan joriy etgan 34 foizlik tarifga javob bo‘ldi. Tramp ushbu tarif olib tashlanmasa, Xitoy mahsulotlariga qo‘shimcha boj solishini bildirdi. Bu haqda BBC nashri ma’lum qildi.

Xitoy esa AQShga «iqtisodiy bosim» o‘tkazayotganlikda ayblab, qat’iy javob berdi. Pekin rasmiylari Amerikani xalqaro qoidalarga zid harakatlarda aybladi. Xitoy elchixonasi bu «protektsionistik zo‘ravonlik» ekanini ochiq bayon qildi.

Tramp seshanba kunigacha muhlat berib, ijtimoiy tarmoqda ogohlantiruvchi post yozdi. Agar Xitoy orqaga chekinmasa, Tramp tariflarni 104 foizgacha oshirishni aytdi. Bu esa savdo urushi chuqurlashishidan xavotir uyg‘otmoqda.

AQSh prezidenti barcha tarif muzokaralarini to‘xtatganini ham ma’lum qildi. Tramp boshqa davlatlar bilan adolatli kelishuvlar tuzishga tayyor ekanini aytdi.

«Endi birinchi navbatda – Amerika», – deya u yakunladi.

Tariflar elektr uskunalar, kompyuterlar, transport vositalariga bevosita ta’sir qilishi mumkin. Xitoydan keltiriladigan ushbu mahsulotlar AQSh importining asosiy qismini tashkil etadi. AQShning Xitoyga eksporti esa don, samolyot va farmatsevtikani o‘z ichiga oladi.

Bozorlarda yuzaga kelgan noaniqlik aksiyalar narxiga salbiy ta’sir qildi. AQSh, Yevropa va Osiyo fond bozorlarida pasayishlar ro‘y berdi. Gonkongdagi Hang Seng indeksi bir kunda 13 foizga tushdi.

FTSE 100, Dax, Nikkei va S&P 500 indekslari ham sezilarli tushdi. Investorlar savdo urushi chuqurlashishi global iqtisodiyotga zarar yetkazishidan xavotirda.

Avvalroq Kursiv Uzbekistan Tramp joriy qilgan tariflarini davo deb atagani haqida xabar bergan edi.